[簡單煮意]男女都補-少甜桑寄生蓮子杜仲茶－陳C9的生命花火

作為新手煮婦，甚少煮飯，但湯水同糖水總會煲下。
同大家介紹下應該都唔陌生嘅桑寄生蓮子杜仲茶。
我估同平日大家飲有DD 唔同係，我選擇唔加蛋，但落杜仲。
先睇睇各種成份功效先：
桑寄生

(網絡圖片)
~ 性平、味苦、甘,
~ 有補肝腎、強筋壯骨、通經絡、安胎的功效

杜仲~指製過的杜仲樹皮

(網絡圖片)
~味甘，性溫。
~有補肝腎、強筋壯骨、固經安胎的功效
~杜仲若配上牛膝、金狗脊等乃治療腰背痛的良方

蓮子 ~
~性平、味甘澀，
~ 歸脾、心、腎經，有補脾止瀉，清心養神益腎的作用

縱觀來睇依三款主要藥材對肝腎，强筋骨同調經安胎有一定功效。
但個人認為孕媽媽最好問清楚醫師，因為人人體質不同，但作為一般男女保健，桑寄生絕對唔單止係女人欣物，男人飲都好有益架！

↑懶C9直接用保溫壺仔飲。

材料份量(好易記:唔係1就8)(✪ω✪)
桑寄生 1碗
杜仲 1片(約半隻手掌大小)
去芯蓮子 8粒
桂圓 8粒
去核紅棗 8粒
片糖 1片
清水 8碗

做法ヽ(✿ﾟ▽ﾟ)ノ
1. 洗淨所有材料，桑寄生需要使用隔篩清洗會較方便。
2. 杜仲可以剪細片（我習慣撕成1條條，煲完會溶晒）
3. 將紅棗及桂圓剪半
4. 冷水跟片糖放煲煲滾後，放晒所有材料一齊滾1小時
(我用真空煲會煲20分鐘，焗1個鐘，再煲15分鐘左右) (個人認為煲1小時會較為出味)
5. 滾起見出晒味就飲得架喇!超簡單!!!!(❛◡❛✿)

分享
. 因為已有桂圓同紅棗，所以糖可以減少，依個味道係淡淡的甜，唔會甘唔會苦。

2. 如果喜歡更少甜，可以不加片糖。

3. 咩都可以唔加，蓮子必定要加，我試過唔落蓮子，口感會單調和鞋D，有蓮子口感會順滑好多，所以係MUST HAVE ITEM!!!!(๑ơ ₃ ơ)♥

4. 有人會喜歡用魚袋入住煲，我係咩都唔飲，等D桑寄生自由自在游飽水出味。其實要筆到無渣唔難，但相信關乎邊度買桑寄生嘅問題

5. 承上，我試過買藥材鋪最傳統的紙盒裝桑寄生，打開好碎雜，葉也是比較多；
位元堂都買過，係最貴，一包仔要30幾蚊，但質素有保證；
余仁生相對較抵，都好靚；
而講到又平又靚，非樓上莫屬，1大包28蚊，唔會碎濕濕，我已經煲過2大包，味道都好正，唔會太甘太鞋，我連杜仲都係喺樓上買，一大盒煲湯同煲桑寄生有排用。

5. 如果沒有真空煲，建議大家可以入手膳魔師(THERMOS)依款套裝。
阿媽介紹我買，因為佢個壺比起一般燜燒杯嘅保溫功能係超出幾班，我試過放粥擺5至6個鐘依然是熱到辣口的!
重點!!!!如果百貨公司做特價時最平試過368元，與其買一個燜燒杯都300幾，依個壺真係無得輸。

(THERMOS 官網圖)